Gratë thuajse nuk zotërojnë fare armë, rrallëherë i përdorin ato dhe, ndryshe nga burrat, ato janë shumë më shpesh viktima sesa autore. Kjo është veçanërisht tronditëse në kontekstin e dhunës në familje. Dhuna me armë kundër grave kryhet kryesisht nga një person i besuar i tyre; bashkëshorti, i dashuri, bashkëshorti/i dashuri i mëparshëm, dhe më shpesh ndodh në një vend që ato e konsiderojnë si më të sigurtin: në shtëpi. Gjithashtu, gratë kanë më shumë gjasa që ta shohin praninë e një arme zjarri si kërcënim për sigurinë e tyre dhe të familjeve të tyre.

Tradita e mbetur pas në kohë

Të shtënat rastësore në dasma, në festimet e Vitit të Ri, ose në festën e pagëzimit të fëmijës, vazhdojnë ende të lënë viktima në Evropën Juglindore. Plumbat që shtihen në ajër zbresin poshtë nën veprimin e forcës së gravitetit dhe zakonisht lënë viktima duke shkaktuar histori tragjike, si historitë e mëposhtme: “një grua qëllohet në kokë nga një plumb qorr dhe vdes”, “3 gra u qëlluan aksidentalisht dhe u plagosën nga një 36-vjeçar gjatë të shtënave për të festuar gjatë një dasme” ose “një vajzë 12-vjeçare mbeti e plagosur nga një plumb qorr ndërsa po kthehej nga shkolla.”

Rreziqet e keqpërdorimit të armëve

Dhuna me armë nuk ndodh vetëm në rrugë, mes bandave kriminale apo ndaj kriminelëve. Që prej vitit 2014, në rajon kanë ndodhur 613 incidente aksidentale me armë. Viktimat e këtyre aksidenteve janë “një vajzë 1-vjeçare u qëllua dhe u plagos nga një djalë 25-vjeçar në një aksident në gjueti”, “një djalë 13-vjeçar, qëlloi veten aksidentalisht” dhe shumë më tepër.

Vetëvrasjet krijojnë thuajse çdo ditë viktima, nga adoleshentët te gjyshërit, nga qytetet te fshatrat, në të gjithë rajonin. Dhe kur armët gjenden kudo, viktima nuk ka asnjë shans të dytë. Shumë prej historive të vetëvrasjes tingëllojnë të tilla: “një nënë qëllon për vdekje vajzën e saj dhe më pas kryen vetëvrasje”, “babë e bijë vetëvriten me një armë dore.” 268 incidente të ngjashme janë raportuar nga media në Evropën Juglindore që prej 2014 deri më sot.

Si shfaqet dhuna me armë? Kush i kryen krimet? Kush preket më shumë nga armët? Çfarë nuk arrijmë të shquajmë ndërsa përpiqemi për të parandaluar dhunën me armë? A preket qyteti juaj nga krimet me armë? Për ta zbuluar këtë, kontrollo Platformën e Monitorimit të Dhunës me Armë.

Bëj analizën tënde